نوبل في علم وظائف الاعضاء والطب:
وسع وسع وسع للمعلم الكبير اللي قلب الموازين ،، ومع اني راجل فيزيائي ومش بطيق بتوع الاحياء دول إلا اني فرحان جدا جدا جدا للراجل العظيم العالم السويدي سفانتي بابو.
الراجل ده مكافح (وانا بحب المكافحين صراحة) عمل حاجة ماحدش عملها قبله .. وقلب موازين العلم كلها ..
الراجل ده قدر يفك الشفرة الجينية لاحد اشباه البشر المنقرضين واللي بيسمى نياندرتال أو الانسان البدائي واللي يعود تاريخها لاكتر من ٣٥٠٠٠ - ٤٠٠٠٠٠ سنة واللي انقرضت من حوالي ٢٥٠٠٠ سنة (ابقوا فكروني احكلكم قصة انقراضها .. حكاية اغرب من الخيال ) مفتريين احنا :)
ومش كدة وبس.. ده اكتشف فصيلة ماكناش نعرفها اصلا (اه والله زي مابقلك كدة) والنوع ده اسمه إنسان دينيسوفان.
الاكتشافات دي هاتساعدنا في فك لغز الحياة على كوكب الارض وتاريخ الانسان القديم.
نوبل في الكيمياء:
الثلاث عباقرة دول ، كارولين بيرتوزي، ومورتن ميلدال، وباري شاربلس (تاني نوبل ليه ابن المحظوظة) ، طوروا فرعين جداد من فروع الكيمياء واللي بيطلق عليهم الكيمياء النقرية Click Chemistry .. اه والله اسمها كدة. والفرع الثاني اسمه الكيمياء الحيوية المتعامدة وده نوع من تفاعلات الجزيئات شديدة الدقة واللي بينها نوع من التوافق الحيوي واللي بتستخدم في الإقتران الحيوي.
الموضوع ده هايعمل ثورة كبيرة في الصناعات الدوائية والحيوية. الناس دي بتسطر تاريخ جديد في العلوم واساميهم هاتتكتب بحروف من نور للاجيال اللي جاية.
نوبل في الفيزياء:
اما نوبل في الفيزياء (حبيبة القلب) فكانت من نصيب الفرنسي آلان أسبيه ٧٥ سنة والأمريكي جون كلاوسر ٧٩ سنة والنمساوي أنتون زيلينغر ٧٧ سنة (ويجي واحد يقولك انا كبرت على العلام - والنبي اتلهي) عن عملهم في مجال ميكانيكا الكم. وينتمي أسبيه إلى جامعة باريس ساكليه الفرنسية، ويبلغ 75 عاما، بينما يبلغ جون كلاوسر 79 عاما وأنتون زيلينغر 77 عاما.
الناس دي عملت ايه بالظبط؟
الناس دي عملوا تجارب رائدة باستخدام حالات كمومية متشابكة، ياعني ايه ياعم؟؟
التشابك الكمي ده ظاهرة في ظاهرم من اهم ظواهر فيزياء الكم، واللي بتحصل لما يتولد زوجان أو مجموعة من الجسيمات أو تتفاعل أو تتشارك الجسيمات ذات قرب مكاني ومانقدرش نوصف الحالة الكمية لجسيم معين بشكل مستقل عن الجسيمات الأخرى، حتى لو فصلت مسافة كبيرة بين هذه الجسيمات. ياعني من الاخر كدة الجسيمات بتأثر على بعض بدون اي اتصال مباشر (سحر يامعلم).
طيب انا كاانسان عادي استفدت ايه؟
وحياة العيش والملح هاتستفيد كتير جدا. الاكتشافات والتجارب اللي بيعملوها اجدادنا دول (بحكم السن ياعني) هاتطور تقنيات جديدة في الحوسبة الكمومية والاتصالات فائقة الأمان، وكمان هاتطور أجهزة الاستشعار الكمومية فائقة الحساسية واللي بتسمح بقياسات في غاية الدقة، زي قياسات الجاذبية في الفضاء.
عاش ياجدو.
مبروك ليكم بجد .. قلب الواحد فرحان
وديما افتكروا .. لسة الطريق طويل ،، وزي مابنقول ،، اللي يعيش لازم يشوف..
وانا بقول ،، اللي يتعلم لازم يكتشف..
اشوفكم في بوست تاني...
والنبي لو عجبك البوست شير ولايك .. ولو حابب كومنت كمان
ولو ماعجبكش .. شير ولايك برضو (انت فاكرني هاسيبك)
سلام
مع تحياتي
شادي القصاص